孫中山紀念館近排舉辦「北洋軍．政．歲月」展覽，專門向天津博物館借咗超過70組珍貴文物，再加上香港歷史博物館、東華三院同本港兩位收藏家嘅珍藏品，加埋展出咗差唔多成100組展品，等大家對當時嘅政局、軍閥並起嘅歷史有多啲認識。阿史梗係唔會錯過，專程去行返轉一心諗住影啲相返嚟俾大家睇吓，點知因為展品唔俾影相，大家唯有睇住紀念館嘅建築特色相同官網相先喇。

紀念館地下主要係睇甘棠弟樓融合咗中西建築特色嘅大廳、柚木樓梯同彩繪玻璃，踩得出呢條樓梯真係有返咁上下歷史，踩上去會發出吱吱聲，阿史上落樓梯果陣要放慢腳步，輕輕力咁行，驚死會破壞文物。一樓就係呢次展覽嘅重點展廳，入面有把「九獅指揮刀」，係袁世凱掌權之後為咗籠絡各地軍閥而特登請日本高手刀匠打造嘅。其刀柄同金屬刀鞘上面有9個用純金鑲嵌嘅獅子頭，當時袁世凱打造咗幾把，不過宜家流傳落嚟嘅得返兩把，分別收藏喺中國博物館用天津博物館，今次睇到呢把就係天津博物館果把。

除咗九獅指揮刀，館內有一份1913年嘅文獻《中國政府善後借款合同》，係袁世凱命令趙秉鈞、周學熙、陸徵祥等同英、法、德、俄、日五國嘅銀行團，簽訂嘅2,500萬英鎊嘅借款合同。當時北洋政府面臨財政危機，需要大量嘅金錢嚟維持政府運營、購買武器同發放軍餉等開支，為咗解決政府嘅財困問題，北洋政府用鹽稅做抵押支付高額利息。

館內仲有好多組文物值得一睇，例如當時嘅報紙、徽章等等，不過阿史對眼唔好，報紙啲字太細粒，真係唔係好睇到佢寫乜。

部份圖片嚟自孫中山紀念館官網。